Moderatori i njohur italian Paolo Bonolis ka konfirmuar se ka nisur një lidhje të re dashurie me sipërmarrësen 32-vjeçare Carola Moroni, duke i dhënë fund spekulimeve të shumta që kishin qarkulluar së fundmi për jetën e tij private.
65-vjeçari, një prej personazheve më të njohur të ekranit italian, vendosi të flasë hapur për romancën e re, pasi ishte fotografuar në shoqërinë e Carolës gjatë një qëndrimi në Londër.
Përmes një reagimi në rrjetet sociale, Bonolis shprehu hapur kënaqësinë që po përjeton në këtë periudhë të jetës së tij.
“Po frekuentoj një grua që më pëlqen shumë, Carolën, dhe po kaloj një kohë vërtet të këndshme me të”, shkroi moderatori, duke konfirmuar kështu lidhjen me sipërmarrësen nga Roma.
Përveç romancës së re, Bonolis foli edhe për raportin me ish-bashkëshorten e tij, Sonia Bruganelli, duke hedhur poshtë aludimet për mosmarrëveshje apo konflikte mes tyre. Ai theksoi se ruajnë një marrëdhënie të mirë dhe vijojnë të bashkëpunojnë, duke pasur si përparësi mirëqenien e fëmijëve të tyre.
Lexo gjithashtu
Madje, moderatori zbuloi se Sonia është gjithashtu në një lidhje dhe se ai ka vlerësim për partnerin e saj. Nga ana tjetër, edhe ish-bashkëshortja duket se e ka pritur mirë romancën e re të Bonolisit dhe ka simpati për Carolën.
Në fund, italiani nuk mungoi të përdorte edhe humorin dhe ironinë ndaj atyre që kërkojnë vazhdimisht detaje sensacionale nga jeta e tij private. Ai i këshilloi të lexojnë libra fantazie, duke përmendur në veçanti serinë “The Dark Tower” të shkrimtarit Stephen King.
