Irani nuk ka ndërmend të rifillojë negociatat me Shtetet e Bashkuara pa marrë më parë një përgjigje të qartë për shtatë kushtet e paraqitura nga Teherani. Qëndrimi është bërë publik nga Mohsen Rezaei, sekretari i Këshillit Suprem të Sigurisë Kombëtare të Iranit, gjatë një interviste për televizionin “Al Mayadeen”.
Rezaei deklaroi se autoritetet iraniane i kanë kërkuar Uashingtonit të shprehet drejtpërdrejt për kërkesat e tyre, por deri më tani nuk kanë marrë një përgjigje përfundimtare.
Sipas tij, përmbushja e këtyre kushteve është thelbësore jo vetëm për rifillimin e bisedimeve mes dy vendeve, por edhe për rihapjen e Ngushticës së Hormuzit, një nga pikat më të rëndësishme strategjike për tregtinë globale të energjisë.
Ndërkohë, përpjekjet diplomatike për t’i dhënë fund konfliktit po vijojnë përmes ndërmjetësimit të Katarit. Kryeministri i këtij vendi u takua të hënën me presidentin amerikan Donald Trump, ku në fokus ishte gjetja e një zgjidhjeje për krizën.
Pas takimit, Trump u shpreh optimist për mundësinë e përfundimit të konfliktit, duke deklaruar se një rikthim te sulmet e mëdha ushtarake kundër Iranit duket pak i mundshëm në këtë fazë. Megjithatë, presidenti amerikan nuk e përjashtoi plotësisht mundësinë e një ndërhyrjeje të re.
Lexo gjithashtu
Sipas raportimit të “Reuters”, Teherani vazhdon të këmbëngulë se çdo marrëveshje me Uashingtonin duhet të kalojë përmes plotësimit të kërkesave të tij. Në këtë situatë, Ngushtica e Hormuzit mbetet një nga pikat kryesore të mosmarrëveshjes mes dy vendeve.
