Detaje të reja dhe tronditëse janë zbuluar pas arrestimit në Athinë të 43-vjeçarit shqiptar Nikolin Pali, i cili ishte në kërkim prej gjashtë vitesh për një vrasje të dyfishtë të ndodhur në Loutraki të Greqisë. Sipas mediave greke, ai dyshohet se ka pranuar përfshirjen edhe në dy vrasje të tjera të kryera në Shqipëri.
Pali u lokalizua dhe u arrestua në një apartament në zonën Kato Patisia të Athinës, gjatë një operacioni të forcave speciale EKAM dhe policisë greke. Ai ishte dënuar në mungesë për vrasjen e ish-partneres së tij, një 43-vjeçare me origjinë ukrainase, si dhe të partnerit të saj, një farmacist grek.
Sipas medias greke “Proto Thema”, gjatë marrjes në pyetje, shqiptari dyshohet se ka rrëfyer edhe përfshirjen në dy krime të tjera me pasoja fatale në Shqipëri. Ndërkohë, hetuesit po verifikojnë nëse ai ka lidhje edhe me ngjarje të tjera të rënda kriminale, përfshirë vrasje të porositura kundrejt pagesës.
Gjatë kontrollit në apartamentin ku u kap, policia sekuestroi një pistoletë, dy granata funksionale, dy mekanizma ndezës, tri palë pranga metalike dhe një dokument qëndrimi të falsifikuar, ku ishte vendosur fotografia e 43-vjeçarit.
Sipas autoriteteve greke, ndaj tij kishte disa vendime dënimi për vrasje me dashje, grabitje dhe zjarrvënie me dëmtim të pronës. Gjithashtu, përmes bashkëpunimit me Interpolin, u konfirmua se ai kërkohej edhe nga drejtësia shqiptare për një grabitje të armatosur të mbetur në tentativë, të kryer në bashkëpunim me persona të tjerë.
Lexo gjithashtu
Krimi i dyfishtë për të cilin Pali ishte shpallur fajtor ndodhi gjatë natës mes 10 dhe 11 tetorit 2020, në një banesë pushimi në Loutraki. Sipas dosjes hetimore, ai dyshohet se hyri në banesë dhe sulmoi me sëpatë ish-partneren dhe partnerin e saj, duke i shkaktuar vdekjen të dyve.
Pas krimit, autori mori para dhe sende me vlerë nga viktimat. Më pas, automjetin e gruas e transportoi në një zonë të izoluar, ku i vuri flakën me qëllim zhdukjen e gjurmëve që mund ta lidhnin me ngjarjen.
Në të njëjtin operacion policor u arrestua edhe një 41-vjeçare shqiptare, e dyshuar për përkrahje të autorit dhe shkelje të legjislacionit për të huajt.
Autoritetet greke dhe shqiptare vijojnë hetimet për të verifikuar pretendimet e reja dhe për të zbardhur nëse 43-vjeçari ka qenë i përfshirë në krime të tjera në të dyja vendet.
