Detaje të reja dalin në dritë lidhur me të kaluarën kriminale të Nikolin Palit, shqiptarit të arrestuar në Athinë, i cili dyshohet se ka pranuar para autoriteteve greke përfshirjen edhe në dy vrasje të tjera të kryera në Shqipëri.
Sipas informacioneve të bëra publike, dy viktimat janë vëllezërit Sejdin dhe Seldjan Vucaj, të cilët dyshohet se janë ekzekutuar nga Pali në vitin 2002, në fshatin Shtoj i Vjetër, në Shkodër.
Identiteti i dy vëllezërve është tashmë i zbardhur, ndërsa pretendimet për përfshirjen e 43-vjeçarit në këtë ngjarje të rëndë pritet të verifikohen dhe dokumentohen nga autoritetet shqiptare.
Pali u arrestua pak ditë më parë në Athinë, pas gjashtë vitesh në kërkim për vrasjen e dyfishtë të ndodhur në Loutraki të Greqisë, në tetor të vitit 2020. Ai dyshohet se vrau me sëpatë ish-partneren e tij dhe partnerin e saj, një farmacist grek.
Ndërkohë, hetimet e autoriteteve greke vijojnë për të zbuluar nëse shqiptari ka qenë i përfshirë edhe në ngjarje të tjera kriminale në Greqi, përfshirë vrasje të mundshme me pagesë.
Lexo gjithashtu
Paralelisht, pritet që pretendimet për dy vrasjet në Shkodër të marrin një vëmendje të veçantë nga organet ligjzbatuese shqiptare, me qëllim verifikimin e plotë të rolit të dyshuar të Palit në këto krime.
