Bernardo Silva do të marrë një nga përgjegjësitë më të rëndësishme në kombëtaren portugeze. Mesfushori i Manchester Cityt është emëruar kapiteni i ri i Portugalisë, duke pasuar Cristiano Ronaldon, i cili për shumë vite mbajti shiritin dhe udhëhoqi përfaqësuesen.
Vendimi është bërë i ditur nga trajneri Jorge Jesus, i cili ka zgjedhur t’ia besojë këtë detyrë një prej futbollistëve më me përvojë të skuadrës.
Edhe pse Bruno Fernandes ishte një tjetër kandidat i mundshëm për këtë rol, zgjedhja ka shkuar për Bernardon, i cili ka më shumë paraqitje me fanellën e Portugalisë mes lojtarëve aktualë.
Silva numëron 115 ndeshje me kombëtaren, ndërsa Bruno Fernandes ka 97. Pas tyre renditen Rúben Dias me 84, João Cancelo me 77 dhe Rúben Neves me 73 paraqitje. Këta pesë futbollistë do të përbëjnë grupin drejtues të Portugalisë, me përgjegjësitë që do të ndahen sipas përvojës ndërkombëtare.
Njoftimi u bë gjatë prezantimit të listës me 28 lojtarë për sfidat e ardhshme të Ligës së Kombeve kundër Danimarkës dhe Uellsit. Portugalia do të përballet me danezët në Braga më 14 nëntor, ndërsa tri ditë më vonë do të luajë në transfertë ndaj Uellsit, në Cardiff.
Lexo gjithashtu
Kështu, Bernardo Silva merr përsipër një trashëgimi të rëndësishme, duke pasuar një prej futbollistëve më të mëdhenj në historinë e kombëtares portugeze.
Cristiano Ronaldo, i cili i dha fund aventurës së tij ndërkombëtare pas 23 vitesh, largohet me një bilanc historik prej 234 ndeshjesh dhe 146 golash. Me të si kapiten, Portugalia fitoi Kampionatin Europian në vitin 2016 dhe dy herë Ligën e Kombeve.
Tashmë, një kapitull i ri nis për luzitanët, me Bernardon që do të mbajë shiritin e kapitenit dhe do të ketë detyrën të udhëheqë brezin e ri të Portugalisë.
