Policia e Vlorës ka zbardhur detaje të reja nga konflikti i ndodhur mbrëmjen e 7 nëntorit në zonën e Ujit të Ftohtë, ku një 34-vjeçar dyshohet se tentoi të përdorte armë zjarri gjatë përplasjes me një 41-vjeçar.
Në pranga ka rënë Mario Meçanaj, banues në Vlorë, i cili rreth orës 20:50 u përfshi në një konflikt për motive të dobëta me shtetasin E.H., banues në Tiranë.
Ngjarja ndodhi në vendin e quajtur “Rrapi”, në zonën e Ujit të Ftohtë. Pas njoftimit, efektivët e policisë ndërhynë për të ndaluar përplasjen.
Gjatë ndërhyrjes, Meçanaj tentoi të largohej me vrap. Sipas raportimeve paraprake, efektivët qëlluan edhe në ajër për ta ndaluar, por ai vijoi të largohej derisa u kap disa metra më tutje.
Sipas njoftimit të policisë, 34-vjeçari dyshohet se gjatë konfliktit ka tentuar të përdorë një pistoletë, të cilën më pas e ka hedhur në rërë, në vendin ku u kap nga efektivët.
Lexo gjithashtu
Arma e zjarrit u gjet dhe u sekuestrua në cilësinë e provës materiale. Gjatë kontrollit të automjetit të tij, policia zbuloi dhe sekuestroi gjithashtu një përforcues metalik grushti.
Njoftimi i Policisë
Vlorë/ Finalizohet operacioni policor i koduar “Yacht”, parandalohet një ngjarje e mundshme kriminale.
Arrestohet 34-vjeçari që tentoi të përdorte armë zjarri gjatë një konflikti.
Sekuestrohen arma e zjarrit pistoletë dhe një përforcues metalik grushti.
Shërbimet e Komisariatit të Policisë Vlorë organizuan dhe finalizuan operacionin policor të koduar “Yacht”, në kuadër të të cilit u arrestua në flagrancë shtetasi M. M., 34 vjeç, banues në Vlorë.
Gjatë patrullimit në lagjen “Uji i Ftohtë”, mbrëmjen e djeshme, rreth orës 20:50, në vendin e quajtur “Rrapi”, punonjësit e Policisë konstatuan një konflikt për motive të dobëta mes 34-vjeçarit dhe shtetasit E. H., 41 vjeç, banues në Tiranë.
Shërbimet e Policisë ndërhynë menjëherë, duke parandaluar përshkallëzimin e situatës. Gjatë ndërhyrjes, 34-vjeçari tentoi të largohej me vrap, por u kap dhe u neutralizua nga punonjësit e Policisë.
Nga veprimet e para hetimore dyshohet se, gjatë konfliktit, 34-vjeçari ka tentuar të përdorë një armë zjarri pistoletë, të cilën më pas e ka hedhur në rërë, në vendin ku u kap nga shërbimet e Policisë. Arma u gjet dhe u sekuestrua në cilësinë e provës materiale.
Gjithashtu, gjatë kontrollit të automjetit të tij, u gjet një përforcues metalik grushti, i cili u sekuestrua në cilësinë e provës materiale.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Vlorë, për veprime të mëtejshme.
