Në një klimë të tensionuar politike, pas protestave të fundjavës në Tiranë, ku pati përplasje dhe përdorim molotovësh, Partia Socialiste dhe Partia Demokratike pritet të rifillojnë diskutimet për Reformën Zgjedhore. Pas disa muajsh ndërprerje, Komisioni i Posaçëm Parlamentar do të mblidhet të hënën, por palët duket se do ta nisin punën pa një qëndrim të përbashkët për prioritetet e tij.
Mësohet se rendi i ditës është përcaktuar nga mazhoranca socialiste. PS synon të plotësojë kuadrin ligjor për organizimin e zgjedhjeve vendore, pas miratimit të ndarjes së re territoriale, e cila parashikon 46 bashki në të gjithë vendin.
Mbledhja e së hënës do të përqendrohet në dy çështje kryesore. E para lidhet me detyrimet që burojnë nga legjislacioni për vetëqeverisjen vendore në kuadër të reformës zgjedhore, ndërsa e dyta ka të bëjë me vijimin e shqyrtimit të projektligjit për financimin e partive politike dhe çështjeve të tjera të mbetura pezull.
Nga ana e opozitës, bashkëkryetari i Komisionit, Oerd Bylykbashi, ka kërkuar që diskutimet të orientohen drejt zbatimit të rekomandimeve të OSBE/ODIHR. Sipas tij, një nga objektivat kryesorë të reformës duhet të jetë garantimi i ndarjes së shtetit nga partia në pushtet.
Për sistemin e ardhshëm zgjedhor, PD ka mbrojtur qëndrimin për lista 100% të hapura, përfshirë edhe zgjedhjen e këshillave bashkiakë. Socialistët, nga ana tjetër, janë shprehur të gatshëm të diskutojnë ndryshimin e sistemit, por me kushtin që në paketën e ndryshimeve kushtetuese të përfshihet edhe reduktimi i numrit të deputetëve, nga 140 në 101.
Lexo gjithashtu
Komisioni i Reformës Zgjedhore drejtohet nga bashkëkryetarët Oerd Bylykbashi, në përfaqësim të PD-së, dhe Damian Gjiknuri, nga radhët e PS-së. Mandati i tij përfundon në fund të nëntorit, çka e bën edhe më të rëndësishme rifillimin e punës dhe arritjen e një dakordësie mes palëve.
