Një incident i tensionuar është regjistruar ditën e sotm në Petropavlivska Borshchahivka, në periferi të Kievit, ku banorë lokalë janë përplasur me persona të lidhur me një njësi të Gardës Kombëtare të Ukrainës.
Ngjarja nisi pas raportimeve se në një godinë private mbaheshin persona në mënyrë të paligjshme dhe se një grup prej rreth 40 njerëzish ndodhej i izoluar në bodrumin e objektit.
Pamjet e publikuara në rrjetet sociale tregojnë një turmë qytetarësh që kërkojnë të hyjnë në godinë, ndërsa disa prej tyre tentojnë të hapin me forcë portën.
Nga ana tjetër, nga brenda pronës raportohet se është hedhur shkumë në drejtim të turmës.
Policia e rajonit të Kievit konfirmoi se kishte marrë një telefonatë nga punonjësit e një shërbimi privat të ambulancës, të cilët pretendonin se po pengoheshin të hynin për t’i dhënë ndihmë mjekësore një personi.
Lexo gjithashtu
Pas mbërritjes në vendngjarje, autoritetet konstatuan se incidenti po zhvillohej pranë një banese private ku ndodheshin ushtarakë të një njësie të Gardës Kombëtare ukrainase.
Policia hodhi poshtë pretendimet për mbajtjen e paligjshme të personave dhe vdekjen e një qytetari.
Edhe Garda Kombëtare deklaroi se nuk kishte informacion për viktima apo të plagosur.
Ndërkohë, në rrjetet sociale janë publikuar edhe dëshmi të një gruaje të paraqitur si mjeke, e cila pretendon se brenda objektit kishte persona me dëmtime të rënda fizike.
Këto pretendime nuk janë konfirmuar në mënyrë të pavarur.
Në vendngjarje kanë mbërritur drejtues të policisë rajonale dhe përfaqësues të komandës së Gardës Kombëtare, të cilët po sqarojnë rrethanat e incidentit.
Deri tani nuk ka prova që e lidhin ngjarjen me presidentin Volodymyr Zelensky apo që konfirmojnë ekzistencën e dhomave sekrete të torturës.
Hetimet dhe verifikimet për atë që ka ndodhur brenda objektit mbeten thelbësore
