Gazetarja e njohur britanike Laura Kuenssberg ka bërë disa rrëfime të bujshme në librin e saj autobiografik “Pay Attention”, ku zbulon episode të pakëndshme që pretendon se ka përjetuar gjatë karrierës së saj në gazetarinë politike.
50-vjeçarja, ish-redaktore politike e BBC-së, tregon se një ministër britanik dhe partnerja e tij i kishin propozuar një marrëdhënie seksuale treshe gjatë një konference partiake.
Sipas rrëfimit të saj, Kuenssberg kishte shkuar në dhomën e hotelit të ministrit për një takim pune, duke besuar se aty do të ishte i pranishëm edhe këshilltari i tij. Por ajo u përball me një situatë krejtësisht të papritur: politikani ndodhej i shtrirë në krevat, me këmishën e zbërthyer, ndërsa pranë tij ishte partnerja.
Gazetarja tregon se përfundoi pijen dhe u largua menjëherë nga dhoma. Ajo pranon se mund ta ketë keqinterpretuar situatën, por e cilëson përvojën si jashtëzakonisht të sikletshme. Kuenssberg ka bërë të ditur se nuk do ta bëjë publik identitetin e ministrit në fjalë.
Në librin e saj, gazetarja rrëfen edhe një tjetër episod shqetësues, ku një ministër tjetër, i martuar, e kishte prekur në mënyrë të papërshtatshme gjatë një mbrëmjeje në teatër. Pas këtij incidenti, ajo vendosi të ndërpriste çdo komunikim me të.
Lexo gjithashtu
Rrëfimet nuk përfundojnë këtu. Kuenssberg flet gjithashtu për mesazhe të papërshtatshme nga politikanë, raste ngacmimesh dhe kërcënime publike që kishte marrë për shkak të punës së saj. Situata ishte bërë aq shqetësuese, sa BBC kishte vendosur t’i caktonte edhe truproja për sigurinë e saj.
Përmes këtij libri, gazetarja sjell në vëmendje anën më pak të dukshme të punës në korridoret e pushtetit britanik, duke rrëfyer përvojat personale dhe situatat e vështira me të cilat është përballur gjatë karrierës.
