Influencuesja australiane e fitnesit, Khiana Smith, 23 vjeçe, po lufton për jetën në një spital në Bali, pasi është diagnostikuar me meningjit bakterial, një infeksion i rëndë që mund të jetë kërcënues për jetën.
E reja ka kaluar nëntë ditë në repartin e terapisë intensive, ndërsa gjatë kësaj periudhe ka përjetuar simptoma shqetësuese, përfshirë humbje të kujtesës, turbullim të shikimit, vështirësi në të folur dhe ndjeshmëri të theksuar ndaj dritës.
Problemet shëndetësore nisën me një dhimbje të fortë koke, e cila u pasua nga marramendje dhe dhimbje gjithnjë e më të padurueshme. Sipas raportimeve, gjendja e saj është rënduar edhe nga pneumonia.
Nga shtrati i spitalit, Khiana ka rrëfyer se vetëm pak javë më parë ishte në gjendje të mirë shëndetësore, duke udhëtuar dhe shijuar jetën, ndërsa tashmë po përballet me një betejë të vështirë për shëndetin.
Ajo ka shprehur dëshirën për t’u kthyer në Australi pranë familjes, por mjekët nuk e konsiderojnë ende të mundur udhëtimin me avion për shkak të gjendjes së saj.
Lexo gjithashtu
Meningjiti bakterial është një infeksion serioz që kërkon trajtim të menjëhershëm mjekësor. Nëse nuk trajtohet në kohë, mund të shkaktojë komplikacione të rënda neurologjike dhe, në raste ekstreme, të përfundojë me humbje jete.
