Aktori i humorit Gazmend Paja ka kallëzuar penalisht gazetarin Elton Tozaj, me pretendimin se ka shpifur ndaj tij në rrjetet sociale.
Sipas padisë të dorëzuar në Prokurorinë e Tiranës, Paja pretendon se Tozaj, në platforma të ndryshme të rrjeteve sociale ka përmendur emrin e tij duke i atribuuar fakte të pavërteta me shprehje nënçmuese që i kanë cënuar rëndë dinjitetin.
Kjo është padia e dytë e bërë publike ndaj gazetarit Tozaj, pas asaj të zëvendësministrit të Infrastrukturës dhe Energjisë Erlind Sulo, po me akuzën e shpifjes.
Prej disa kohësh, në rrjetet sociale si TikTok dhe Instagram, gazetari Tozaj aludon për lidhje intime apo jashtëmartesore për personazhe të njohur nga arti, politika dhe fusha të tjera, për të cilët thotë se disponon video apo informacion.
“I akuzuari, shtetasi Elton Tozaj, në cilësinë e njeriut të showbizit dhe krijuesit të përmbajtjes në rrjetet sociale, ka publikuar video në platforma të ndryshme (TikTok dhe YouTube), në të cilat përmend emrin e viktimës akuzuese dhe i atribuon atij fakte e sjellje të pavërteta, si dhe përdor shprehje nënçmuese, duke cenuar rëndë nderin, dinjitetin dhe figurën e tij publike e profesionale”, thuhet në padi.
