Këngëtarja shqiptare me famë ndërkombëtare, Dua Lipa, ka shënuar një fitore ligjore në mbrojtje të emrit dhe markës së saj, pas një çështjeje që lidhej me përdorimin e paautorizuar të identitetit të saj për shitjen e produkteve online.
Sipas raportimit të Daily Mail, Organizata Botërore e Pronësisë Intelektuale (WIPO) ka vendosur në favor të artistes në një mosmarrëveshje me një tregtar nga Hong Kongu, i identifikuar si Gary. Ai kishte regjistruar domenin “dualipa-asiastore.com”, përmes të cilit tregtonte veshje, çanta dhe aksesorë të lidhur me emrin e këngëtares, pa autorizimin e saj.
Pas shqyrtimit të çështjes, WIPO arriti në përfundimin se domeni ishte regjistruar dhe përdorur në keqbesim. Për këtë arsye, organizata urdhëroi transferimin e tij te kompania që përfaqëson interesat e artistes.
Përtej kësaj fitoreje ligjore, Dua Lipa vazhdon të ketë rezultate të rëndësishme edhe në fushën e biznesit. Sipas dokumenteve financiare të kompanive të saj, aktivitetet që lidhen me muzikën, të drejtat autoriale, koncertet dhe sipërmarrjet tregtare kanë gjeneruar rreth 23.4 milionë paund të ardhura. Ndërkohë, kompania e saj Radical22 vlerësohet në rreth 73 milionë paund.
Sukses të konsiderueshëm ka shënuar edhe turneu botëror “Radical Optimism”. Gjatë vitit 2025, 81 koncertet e këtij turneu kanë gjeneruar, sipas shifrave të raportuara, rreth 162 milionë paund të ardhura bruto.
Lexo gjithashtu
Kështu, Dua Lipa vijon të konsolidojë pozitat e saj si një prej emrave të njohur të muzikës ndërkombëtare, duke mbrojtur njëkohësisht identitetin artistik dhe interesat e saj tregtare.
