Një aksident i rëndë rrugor i ndodhur pasditen e sotme në aksin Levan–Vlorë ka përfunduar në tragjedi. 74-vjeçari Agur Shahaj, banor i zonës së Levanit, ka ndërruar jetë disa orë pas përplasjes me një automjet.
Ngjarja u regjistrua rreth orës 18:00, në rrugën e vjetër Levan–Vlorë. Sipas të dhënave paraprake, automjeti që drejtohej nga 58-vjeçari Agron Biçakaj ka përplasur këmbësorin, duke e lënë atë të plagosur rëndë.
Menjëherë pas aksidentit, Shahaj u transportua drejt Spitalit Rajonal të Fierit për të marrë ndihmën e nevojshme mjekësore, por fatkeqësisht nuk arriti t’u mbijetojë plagëve të marra.
Ndërkohë, drejtuesi i automjetit është shoqëruar në Komisariat për veprime të mëtejshme procedurale. Nga testi i alkoolit rezultoi se ai nuk kishte konsumuar pije alkoolike.
Grupi hetimor po vijon punën për të zbardhur rrethanat e plota dhe shkakun e aksidentit tragjik.
