Ambasada amerikane ka publikuar një njoftim sigurie për qytetarët e saj që ndodhen në Europë, duke u kërkuar të tregojnë vigjilencë të shtuar në hapësirat publike të frekuentuara.
Sipas njoftimit, amerikanët këshillohen të bëjnë kujdes në aktivitetet festive, qendrat e transportit dhe vendet ku grumbullohen shumë njerëz, si dhe të shmangin pjesëmarrjen në demonstrata.
Njoftimi vjen në prag të sezonit të festave të fundvitit, kur qytetet europiane presin fluks të shtuar turistësh dhe organizojnë tregje Krishtlindjesh e aktivitete masive.
Në paralajmërim përmenden si zona që kërkojnë vëmendje të veçantë tregjet e Krishtlindjeve, qendrat tregtare, atraksionet turistike, vendet e kultit, aeroportet dhe stacionet e trenave.
Autoritetet amerikane theksojnë gjithashtu rrezikun e sulmeve të mundshme pa paralajmërim paraprak, përfshirë ato nga individë të veçantë apo grupe të organizuara.