Një avion luftarak F-4 Phantom është rrëzuar të shtunën pasdite gjatë aktivitetit ajror Athens Flying Week, në Tanagra të Greqisë. Si pasojë e aksidentit kanë humbur jetën dy pilotët që ndodheshin në bord.
Momenti i rrëzimit është regjistruar në video nga spektatorët dhe pamjet janë publikuar në rrjetet sociale. Në video, avioni shihet duke fluturuar në lartësi të ulët, më pas humb gradualisht humbur lartësi përpara se të përplaset me tokën.
Sipas raportimeve fillestare, avioni u rrëzua pak pasi kishte nisur demonstrimin e tij, ndërsa qindra persona po ndiqnin shfaqjen nga afër.
Dy pilotët e avionit, nuk arritën të aktivizonin sistemet e katapultimit.
Lexo gjithashtu
Në operacion u angazhuan 85 zjarrfikës, 23 automjete, dy grupe këmbësorësh të njësive speciale të zjarrfikësve dhe një ekip i EKAM. Për shuarjen e zjarrit nga ajri u mobilizuan gjithashtu 7 avionë dhe 4 helikopterë.
Sipas informacioneve paraprake, avioni është ndarë në dy pjesë dhe zjarri ka shpërthyer në dy pika të ndryshme. Raportohet gjithashtu se avioni ka rënë në një zonë pranë një biznesi.
Menjëherë pas marrjes së lajmit për aksidentin, ministri grek i Mbrojtjes, Nikos Dendias, ndërpreu programin e tij në Panairin Ndërkombëtar të Selanikut dhe u nis urgjentisht drejt Athinës. Edhe Presidenti i Republikës, Konstantinos Tasoulas, anuloi një aktivitet të planifikuar në Methoni dhe u kthye në Athinë.
Historia e Phantom-it në Forcat Ajrore Greke
F-4 Phantom II është një nga avionët luftarakë më ikonë në historinë e aviacionit. Është një avion amerikan me dy vende dhe dy motorë, i projektuar për misione të ndryshme.
Greqia mori Phantom-ët e parë në vitin 1974, në kuadër të programit amerikan Peace Icarus. Më vonë, një pjesë e avionëve u modernizuan me sisteme të reja elektronike dhe pajisje moderne, duke i lejuar ata të qëndronin në shërbim për dekada.
F-4E Phantom grek ka një ekuipazh prej dy personash, pilotin dhe oficerin përgjegjës për sistemet e armëve. Avioni mund të arrijë një shpejtësi maksimale prej rreth 2,370 km/orë dhe një lartësi operative mbi 15,000 metra.
Shkaqet e rrëzimit të avionit nuk janë bërë ende të ditura. Autoritetet greke kanë nisur hetimet për të përcaktuar se çfarë shkaktoi aksidentin.
