Një rrjet i dyshuar kriminal, i përbërë kryesisht nga shtetas shqiptarë dhe i përfshirë në grabitje banesash në disa vende europiane, është goditur nga autoritetet britanike. Brenda një jave, pesë shqiptarë janë dënuar në Britaninë e Madhe për përfshirje në vjedhje të organizuara në disa zona të vendit.
Dionis Doku dënohet me 3 vite e 10 muaj burg
Sipas njoftimit të Policisë së Kentit, Dionis Doku është dënuar me 3 vite e 10 muaj burg për një seri grabitjesh banesash.
Hetuesit dokumentuan nëntë vjedhje të kryera në Kent, Londër, Buckinghamshire dhe Surrey. Gjatë tyre, Doku dyshohet se kishte vjedhur çanta të markave luksoze dhe bizhuteri me vlerë mbi gjysmë milioni paund.
Identifikimi i tij u bë i mundur edhe përmes gjurmëve të ADN-së, të gjetura në një shishe me spraj antibakterial, të cilën dyshohet se e kishte përdorur për të pastruar vendin e ngjarjes.
Lexo gjithashtu
Policia e pikasi Dokun në një stacion autobusi në Uxbridge Road, ndërsa patrullat po mblidhnin pamjet e kamerave të sigurisë. Ai u arrestua në vendngjarje.
Katër shqiptarë të tjerë të dënuar në Londër
Ndërkohë, Policia Metropolitane e Londrës ka njoftuar dënimin e katër shtetasve shqiptarë, të dyshuar për grabitje banesash, kryesisht në pronësi të personave me origjinë aziatike.
Çlirim Ferizi dhe Oresti Saliaj janë dënuar me një total prej pesë vitesh e gjashtë muajsh burgim. Hetuesit arritën t’i identifikonin përmes pamjeve të kamerave të sigurisë, gjurmëve të ADN-së të gjetura në banesat e grabitura dhe të dhënave të qelizave telefonike.
Edhe kartat e transportit publik Oyster, të përdorura në metro, ndihmuan hetuesit të rindërtonin lëvizjet e tyre në zonat ku ishin kryer vjedhjet.
Arrestimi i dy bashkëpunëtorëve pas një grabitjeje në Ealing
Në kuadër të së njëjtës çështje janë dënuar edhe Dionis Hetaj, 35 vjeç, dhe Arben Cuka, 31 vjeç.
Sipas Policisë Metropolitane, të hënën, më 19 janar 2026, autoritetet morën njoftim për një vjedhje në një banesë në Ealing. Efektivët mbërritën brenda pak minutash dhe gjetën Dionis Hetajn në çatinë e banesës, ku dyshohet se ishte ngjitur në përpjekje për t’iu shmangur arrestimit.
Me ndihmën e Njësisë së Qenve të Policisë Metropolitane, ai u kap dhe iu gjetën një levë hekuri dhe sende që dyshohet se ishin vjedhur nga banesa.
Arben Cuka u lokalizua dhe u arrestua më vonë, të mërkurën, më 4 mars. Të dy u dënuan me një total prej pesë vitesh burgim nga Gjykata e Kurorës në Isleworth.
Autoritetet britanike vijojnë të përdorin provat e ADN-së, pamjet filmike dhe të dhënat e komunikimeve për dokumentimin e grabitjeve dhe identifikimin e personave të përfshirë.
