Një lajm i trishtë ka prekur futbollin shqiptar në Maqedoninë e Veriut. Agron Memedi, ish-futbollist dhe pjesëtar i stafit teknik të Shkëndijës së Tetovës, është ndarë nga jeta.
Lajmi i hidhur është bërë publik nga klubi tetovar, i cili përmes një mesazhi prekës ka njoftuar humbjen e një prej njerëzve që kanë qenë pjesë e familjes kuqezi.
Memedi kishte dhënë kontributin e tij për Shkëndijën në dy role të ndryshme, fillimisht si futbollist dhe më pas si anëtar i stafit teknik, duke mbetur i lidhur me klubin edhe pas përfundimit të karrierës në fushën e lojës.
Në reagimin zyrtar, Shkëndija ka shprehur ngushëllimet për familjen e tij, të afërmit dhe të gjithë ata që e njohën dhe e patën pranë.
Klubi thekson se Agron Memedi do të mbetet gjithmonë pjesë e familjes kuqezi, ndërsa mesazhin e ka mbyllur me fjalët prekëse: “U prehsh në paqe Goni!”.
Lexo gjithashtu
REAGIMI I PLOTË I SHKËNDIJËS:
Me dhimbje të thellë njoftojmë ndarjen nga jeta të Agron Memedit, ish-futbollistit dhe anëtarit të stafit teknik të klubit tonë.
Sot, Shkëndija humbi një prej njerëzve të saj, një pjesëtar të familjes kuqezi, i cili fillimisht veshi fanellën tonë si futbollist dhe më pas vijoi të kontribuonte në klub si pjesë e stafit teknik.
Në këto momente të vështira, mendimet dhe lutjet tona janë me familjen Memedi, të afërmit dhe të gjithë ata që e njohën dhe e deshën Agronin.
Ai do të jetë gjithmonë pjesë e familjes sonë.
U prehsh në paqe Goni!
