Holanda po harton një plan të posaçëm për të garantuar furnizimin me ushqime në rast të një krize të rëndë, si lufta, një sulm masiv kibernetik apo ndërprerja e zgjatur e energjisë elektrike.
Sipas mediave holandeze, zinxhirët kryesorë të supermarketeve, mes tyre Albert Heijn, Jumbo dhe Aldi, po diskutojnë krijimin e pikave të posaçme emergjence, të cilat do të mund të vazhdojnë aktivitetin edhe në kushte të jashtëzakonshme.
Plani parashikon që në çdo rajon të caktohen supermarkete ekzistuese, të pajisura me gjeneratorë rezervë për të garantuar funksionimin e kasave, sistemeve të pagesave dhe pajisjeve frigoriferike.
Synimi është që çdo banor të ketë një pikë të tillë furnizimi brenda 15 minutash me makinë.
Në rast aktivizimi të planit, supermarketet do të ofrojnë një gamë të kufizuar produktesh, duke u përqendruar te ushqimet dhe mallrat më të domosdoshme për popullsinë.
Lexo gjithashtu
Nisma po diskutohet në bashkëpunim me organizatën e industrisë së supermarketeve CBL dhe Ministrinë e Bujqësisë.
Një nga shqetësimet kryesore është varësia e zinxhirit ushqimor nga sistemet dixhitale, të cilat mund të paralizohen nga sulmet kibernetike ose ndërprerjet e energjisë.
Diskutimet janë intensifikuar pas incidenteve të fundit kibernetike që prekën sistemet e shpërndarjes së ushqimeve në vend.
Megjithatë, plani është ende në fazë diskutimi dhe detajet për financimin, rezervat ushqimore dhe funksionimin e pikave emergjente nuk janë përfunduar. Vendimmarrja përfundimtare pritet përpara verës së vitit 2027.
