Izraeli po përgatitet për mundësinë e një sulmi të ri ushtarak ndaj Iranit, edhe nëse Shtetet e Bashkuara nuk do të përfshihen drejtpërdrejt në operacion. Lajmi bëhet i ditur nga media izraelite Ynet, sipas së cilës Tel Avivi po përpiqet njëkohësisht të bindë Uashingtonin të rifillojë ofensivën kundër Teheranit.
Sipas raportimit, ushtria izraelite po përditëson listën e objektivave të mundshëm, ndërsa Forcat Ajrore po rishikojnë përvojën dhe mësimet e operacioneve të mëparshme.
Kjo tregon se Izraeli po shqyrton edhe skenarin e veprimit të pavarur, pa mbështetjen ushtarake amerikane.Në qendër të shqetësimeve të Tel Avivit është edhe programi bërthamor iranian.
Agjencia Ndërkombëtare e Energjisë Atomike ka ngritur shqetësime për impiantin e pasurimit të uraniumit në Isfahan, duke deklaruar se nuk ka mundur të verifikojë vendndodhjen e saktë, statusin dhe praninë e mundshme të materialeve bërthamore në këtë objekt.
Megjithatë, sipas Ynet, zyrtarët izraelitë të sigurisë nuk kanë konstatuar aktualisht shenja të një sulmi të afërt iranian.
Lexo gjithashtu
Edhe brenda strukturave ushtarake ka rezerva për kohën e përshtatshme të një operacioni të ri.Ndërkohë, presidenti amerikan Donald Trump nuk ka dhënë ende dritën jeshile për rifillimin e sulmeve.
Sipas Reuters, ai u ka thënë këshilltarëve se mund të shmangë një ofensivë të re, për sa kohë që Irani ose rebelët Houthi nuk ndërmarrin provokime të tjera ndaj interesave amerikane.
Në këtë klimë pasigurie, Izraeli po përgatitet për disa skenarë: koordinim me Uashingtonin, pritje për një vendim amerikan ose një operacion të pavarur kundër Iranit.
