Rusia ka sulmuar gjatë natës me raketa balistike në Kiev, ku raportohet për disa persona të plagosur pas goditjes së një zone pranë një konvikti universitar. Presidenti ukrainas, Volodymyr Zelensky, bëri të ditur se ekipet e shpëtimit po vijojnë kërkimet, pasi dyshohet se disa persona mund të kenë mbetur të bllokuar nën rrënoja.
Sipas mediave të huaja, Zelensky deklaroi në një mesazh në rrjetin social X se raketat goditën zona të populluara dhe se pranë vendit të sulmit nuk ndodhej asnjë objekt ushtarak.
“Ky ishte një sulm i drejtpërdrejtë ndaj qytetit dhe infrastrukturës së tij. Fatkeqësisht, mund të ketë sulme të tjera”, u shpreh presidenti ukrainas.
Raportohet për deri në 10 të plagosur
Kryebashkiaku i Kievit, Vitali Klitschko, njoftoi se nga sulmi në kryeqytet janë plagosur deri në 10 persona, shumica prej tyre studentë.
Lexo gjithashtu
Në një mesazh të publikuar në Telegram, ai bëri të ditur se në lagjen Desnyanskyi ishte goditur një zonë pranë konviktit të një universiteti, duke shkaktuar thyerjen e xhamave të ndërtesës. Sipas tij, në atë zonë nuk ishte raportuar zjarr.
Klitschko tha se nëntë persona ishin dërguar në spital. Ndërkohë, operacionet e kërkim-shpëtimit vijojnë për të përcaktuar nëse ka persona të tjerë të bllokuar nën rrënoja.
Armëpushim lokal për ndihma humanitare në Oleshky
Zhvillimet vijnë në një kohë kur Rusia dhe Ukraina kanë konfirmuar një armëpushim të kufizuar në zonën e qytetit Oleshky, të pushtuar nga Rusia, me synimin për të mundësuar shpërndarjen e ndihmave humanitare dhe evakuimin e banorëve.
Qyteti, i vendosur në jug të Ukrainës, përballet me mungesa të mëdha të ushqimeve dhe ilaçeve. Sipas raportimeve, marrëveshja synon të lehtësojë furnizimin e banorëve dhe largimin e personave që kanë nevojë për ndihmë.
Dmytro Lubinets, komisioneri parlamentar ukrainas për të drejtat e njeriut dhe kreu i ekipit negociator të Ukrainës, deklaroi se pala ukrainase po i përmbahet angazhimeve të saj.
Ndërkohë, Ministria ruse e Mbrojtjes njoftoi se kishte ndalur bombardimet në drejtim të qytetit ukrainas të Khersonit nga ora 04:00 sipas kohës së Moskës, në kuadër të përgatitjeve për armëpushimin në zonën e Oleshky-t, që ndodhet përtej lumit Dnieper.
Sipas Lubinets, marrëveshja u arrit në koordinim me Zonjën e Parë të SHBA-së, Melania Trump, dhe me komisioneren ruse për të drejtat e njeriut, Yana Lantratova.
Raportimet nga jugu i Ukrainës përshkruajnë një situatë të vështirë humanitare, ndërsa mijëra banorë përballen me mungesa furnizimesh dhe vështirësi për t’u larguar nga zonat e izoluara.
