Kina e ka cilësuar si një takim me rëndësi të jashtëzakonshme dhe me karakter historik takimin e ardhshëm trepalësh mes presidentit kinez Xi Jinping, presidentit amerikan Donald Trump dhe presidentit rus Vladimir Putin.
Zëdhënësja e Ministrisë së Jashtme kineze, Mao Ning, deklaroi se takimi do të ketë rëndësi të veçantë për marrëdhëniet mes tre fuqive të mëdha dhe për stabilitetin ndërkombëtar.
Sipas saj, liderët do të zhvillojnë diskutime të thelluara mbi mbrojtjen e paqes botërore dhe promovimin e stabilitetit strategjik në marrëdhëniet mes fuqive të mëdha.
Takimi pritet të mbahet më 19 nëntor në qytetin Shenzhen të Kinës, në kuadër të samitit të Bashkëpunimit Ekonomik Azi-Paqësor (APEC). Ai do të jetë takimi i parë i drejtpërdrejtë trepalësh mes liderëve të Kinës, SHBA-së dhe Rusisë.
Një nga çështjet që pritet të diskutohet është kontrolli dhe reduktimi i arsenaleve bërthamore, temë që është ngritur nga administrata amerikane. Megjithatë, Kina deri më tani ka argumentuar se SHBA-ja dhe Rusia, si dy vendet me arsenalet më të mëdha bërthamore, duhet të negociojnë fillimisht mes tyre.
Axhenda e plotë e takimit nuk është bërë ende publike, ndërsa zhvillimi i tij po shihet me interes të madh në arenën ndërkombëtare, për shkak të ndikimit që tre fuqitë kanë në zhvillimet gjeopolitike globale.