Kryetarja e Kuvendit të Serbisë, Ana Brnabiç, ka akuzuar opozitën dhe kundërshtarët politikë se po përpiqen të organizojnë një fushatë për arrestimin e presidentit Aleksandar Vuçiç, pas kërkesave për ta marrë atë në pyetje në lidhje me tragjedinë e Novi Sadit, ku humbën jetën 16 persona.
Përmes një reagimi në rrjetin social X, Brnabiç e cilësoi situatën si një përpjekje për përndjekje politike, duke pretenduar se synimi i kundërshtarëve nuk është zbardhja e ngjarjes dhe vendosja e drejtësisë, por largimi i Vuçiçit nga skena politike.
“Premtuan terror revolucionar, dhe tani po shohim terror revolucionar”, shkroi ajo, duke shprehur kundërshtimin ndaj kërkesave për marrjen në pyetje të presidentit serb.
Sipas Brnabiçit, fushata kundër Vuçiçit ka nisur më pak se 72 orë pas fitores së Listës Studentore në zgjedhje. Ajo i konsideroi të pajustifikuara kërkesat për marrjen e tij në pyetje dhe kërkoi që hetimet të shtrihen edhe te personat që kanë pasur përgjegjësi për kontrollin e projektit dhe miratimin e punimeve në stacionin hekurudhor.
Në mbrojtje të qëndrimit të saj, Brnabiç solli si shembull shembjen e një pjese të çatisë së terminalit të aeroportit Charles de Gaulle në Francë, në vitin 2004, ku humbën jetën katër persona. Ajo vuri në pikëpyetje nëse presidenti i atëhershëm francez, Jacques Chirac, do të ishte thirrur për t’u marrë në pyetje si i dyshuar në rrethana të ngjashme.
Lexo gjithashtu
“Qëllimi këtu është të heshtet dhe të largohet Aleksandar Vuçiçi, dhe jo të vihet drejtësia në vend”, deklaroi kryetarja e Kuvendit të Serbisë.
Brnabiç shtoi se Partia Progresive Serbe do të kundërshtojë atë që ajo e cilësoi si “terror revolucionar”.
Deklaratat vijnë në një klimë të tensionuar politike në Serbi, ku tragjedia e Novi Sadit ka nxitur protesta dhe kërkesa për përgjegjësi institucionale.
