Rritja e rasteve të gripit të shpendëve në Bullgari dhe Shqipëri ka ngritur alarmin te autoritetet veterinare greke, të cilat kanë shtuar masat parandaluese për të shmangur përhapjen e mëtejshme të virusit. Fermerëve u kërkohet të zbatojnë rregulla të rrepta të biosigurisë dhe të mbajnë shpendët të izoluar, për të kufizuar kontaktin me shpendët e egër.
Shqetësimi i autoriteteve është shtuar pas shpërthimit të gripit të shpendëve me patogjenitet të lartë në Bullgari, si dhe konstatimit të një vatre infeksioni në një fermë me shpendë shtëpiakë në Shqipëri, në mesin e muajit tetor.
Situata paraqitet shqetësuese edhe në disa vende të tjera evropiane, përfshirë Gjermaninë, Norvegjinë, Danimarkën dhe Qipron, ku janë raportuar një numër në rritje i mostrave pozitive. Ndërkohë, në nivel global janë evidentuar edhe raste të transmetimit të virusit te gjitarët, si të egër ashtu edhe shtëpiakë.
Një faktor tjetër që shton rrezikun është lëvizja sezonale e shpendëve migratorë, të cilët mund të favorizojnë përhapjen e virusit në territore të reja. Për këtë arsye, autoritetet greke vlerësojnë se mundësia e rikthimit të sëmundjes në vend gjatë periudhës së ardhshme është e konsiderueshme.
Drejtoria Veterinare e Rajonit të Maqedonisë Qendrore u ka rikujtuar fermerëve detyrimin për të respektuar masat e biosigurisë. Sipas udhëzimeve në fuqi, ndalohet mbajtja e shpendëve në ambiente të hapura në një rreze më të vogël se dy kilometra nga ligatinat, lumenjtë, liqenet dhe burimet e tjera ujore.
Lexo gjithashtu
Në këto zona pezullohet gjithashtu aktiviteti i fermave me sistem të lirë dhe atyre organike, me përjashtim të rasteve kur plotësohen kushtet përkatëse për mbrojtjen e shpendëve.
Edhe në territoret ku izolimi nuk është i detyrueshëm, rekomandohet që shpendët të mbahen në ambiente të mbyllura deri në fund të prillit, për të shmangur kontaktin me shpendët e egër.
Autoritetet u bëjnë thirrje fermerëve që të raportojnë menjëherë çdo shtim të rasteve të sëmundjes apo ngordhjeve të shpendëve, pasi gripi i shpendëve është një sëmundje që duhet të deklarohet zyrtarisht.
Një apel u është drejtuar edhe punonjësve të pyjeve, gjuetarëve, rojtarëve të gjahut dhe organizatave që merren me mbrojtjen e shpendëve, për të njoftuar pa vonesë autoritetet në rast se konstatojnë shpendë të ngordhur, të plagosur apo në gjendje të rëndë.
Situata po ndiqet me kujdes në rajon, ndërsa masat parandaluese synojnë të shmangin përhapjen e mëtejshme të një sëmundjeje që mund të shkaktojë dëme të konsiderueshme në sektorin e shpendarisë.
