Procesi i afrimit dhe bashkimit mes Republikës së Moldavisë dhe Rumanisë ka nisur tashmë në praktikë. Kështu është shprehur ministri i Jashtëm moldav, Mihai Popșoi, duke iu referuar projekteve të përbashkëta infrastrukturore dhe energjetike mes dy vendeve.
Në një intervistë për televizionin TVR Info, Popșoi deklaroi se bashkëpunimi mes dy vendeve po merr formë konkrete përmes ndërtimit të autostradës së Bashkimit, urave mbi lumin Prut dhe lidhjeve energjetike.
“Duhet ta dini se kjo tashmë po ndodh. Autostrada e Bashkimit, e cila po ndërtohet dhe do të mbërrijë në Ungheni, është një hap shumë i rëndësishëm në këtë drejtim”, deklaroi ministri.
Ai theksoi se projektet konkrete dhe afrimi ekonomik janë më bindëse për qytetarët sesa deklaratat politike dhe debatet simbolike mbi bashkimin.
Megjithatë, Popșoi nuk njoftoi ndonjë plan apo datë për bashkimin formal të dy shteteve. Ai nënvizoi se një vendim i tillë duhet të jetë rezultat i një procesi demokratik dhe të mbështetet nga shumica e qytetarëve.
Edhe presidentja moldave Maia Sandu ka deklaruar më parë se në rast të një referendumi do të votonte pro bashkimit me Rumaninë. Megjithatë, ajo ka pranuar se aktualisht kjo ide nuk gëzon mbështetjen e shumicës së popullsisë.
Ndërkohë, qeveria e Kishinaut vijon ta konsiderojë integrimin në Bashkimin Europian objektivin kryesor strategjik të vendit.