Kreu i Grupit Parlamentar të Partisë Socialiste, Taulant Balla, deklaroi se mazhoranca do të vijojë punën për përfundimin e reformës zgjedhore, pavarësisht nëse opozita do të marrë pjesë në mbledhjet e komisionit.
Balla bëri të ditur se afati për përmbylljen e punës së komisionit është 30 nëntori, ndërsa akuzoi Partinë Demokratike se po përdor bojkotin për të penguar procesin.
Sipas tij, mazhoranca i ka dhënë opozitës të drejtën e vetos, edhe pse disponon 3/5 e votave në Kuvend. Ai paralajmëroi se, nëse PD-ja nuk rikthehet në komision deri në afatin e përcaktuar, PS-ja do të depozitojë propozimet e saj në Kuvend dhe do t’i miratojë me votat që ka në dispozicion.
“Kush e bojkotoi komisionin? E bojkotuan ata! Komisioni nuk ka pse të ndërpritet. Nuk ke pse e lë vendin duke abuzuar me një të drejtë, si ajo e vetos. PD t’i sjellë të gjitha propozimet në komision. Të diskutohen, por bojkoti i komisionit me një të drejtë që ta kemi dhënë ne, është i papranueshëm. PD duhet të kuptojë që edhe ne kemi pasur disa propozime, si rikthimi i numërimit në qendrat e votimit. Nëse PD nuk do të vijë në komision deri më 30 nëntor, mos të habitet kur të çojmë propozimet tona në Kuvend”, deklaroi Balla.
Gjatë prononcimit, Balla përmendi disa prej ndryshimeve që mazhoranca synon të përfshijë në reformën zgjedhore. Një prej tyre është mundësia që edhe ish-bashkitë e vogla, të cilat u shkrinë gjatë reformës territoriale, të kenë përfaqësuesit e tyre në këshillat bashkiakë, sipas një përpjesëtimi të caktuar.
Lexo gjithashtu
Një tjetër propozim është rikthimi i numërimit të votave në qendrat e votimit. Sipas Ballës, kjo do të shkurtonte ndjeshëm kohën e nxjerrjes së rezultateve. Ai foli gjithashtu për rikthimin e një formule të parashikuar në vitin 2020, që lidhet me depolitizimin e komisioneve zgjedhore.
Në fund, Balla shprehu kundërshtimin e tij për hapjen e listave për kandidatët e këshillave bashkiakë, duke sqaruar se për këtë çështje po fliste në cilësinë e deputetit dhe politikanit.
“Flas si deputet dhe politikan me shumë vite mbi supe. Sa i përket hapjes së listave për anëtarët e këshillave bashkiakë, unë jam kundër”, përfundoi Balla.
