Arrestimi i 50-vjeçarit Robert Duka në Tiranë ka tërhequr vëmendjen edhe të mediave greke, të cilat kanë publikuar detaje mbi të kaluarën e tij dhe dyshimet për përfshirje në aktivitet kriminal në shtetin fqinj.
Media greke “Protothema” shkruan se Duka, i njohur gjithashtu me emrin Albert Duka, është akuzuar më parë për lidhje me një grup të strukturuar kriminal, i dyshuar për kryerjen e 28 grabitjeve të bankave në Greqi.
50-vjeçari u vu në pranga nga Policia e Tiranës në kuadër të operacionit të koduar “Gjuetari i Bankave”. Ai dyshohet se është autori i dy grabitjeve të armatosura në kryeqytet, të kryera më 2 qershor dhe 2 nëntor 2026, në zonën e Komunës së Parisit, ku në total janë marrë rreth 75 mijë euro.
Ngjarja e fundit ndodhi më 2 nëntor, rreth orës 10:45. Sipas hetimeve, autori, i maskuar dhe i veshur me rroba të zeza, mbërriti pranë bankës me një skuter elektrik. Pasi hyri në filial, ai mbylli derën për të penguar personat brenda të largoheshin dhe, nën kërcënimin e armës, detyroi punonjësin e sigurisë dhe arkëtaren t’i dorëzonin paratë.
Pas marrjes së rreth 60 mijë eurove në valuta të ndryshme, autori u largua me të njëjtin mjet. Ndërsa grabitja e parë ishte regjistruar pesë muaj më parë, më 2 qershor, në një tjetër filial bankar të së njëjtës zonë, ku ishin marrë rreth 15 mijë euro.
Lexo gjithashtu
Në raportimin e saj, media greke i kushton vëmendje të veçantë edhe dyshimeve për aktivitetin e mëparshëm të Dukës në Greqi. Sipas artikullit, autoritetet shqiptare e kishin mbajtur prej disa ditësh nën vëzhgim, pasi dyshohej se po përgatitej të largohej sërish drejt vendit fqinj.
Mes detajeve të tjera të publikuara përmendet edhe fakti se bashkëshortja e tij punon në një institucion tjetër bankar në Shqipëri. Duka banonte në Vlorë, por kishte marrë me qira edhe një apartament në Tiranë, që dyshohet se e përdorte si bazë për qëndrimin e tij në kryeqytet.
Arrestimi u krye pranë Rrugës së Kosovarëve. Gjatë kontrollit, efektivët sekuestruan 8 200 euro, dy telefona celularë dhe disa veshje, të cilat dyshohet se janë përdorur gjatë grabitjeve.
Sipas policisë, identifikimi i 50-vjeçarit u bë i mundur përmes metodave speciale hetimore, përdorimit të sistemeve teknologjike dhe analizimit të veshjeve të autorit, i cili kishte ndërmarrë masa për të fshehur identitetin.
Ndërkohë, hetimet vijojnë për dokumentimin e plotë të dy grabitjeve në Tiranë, si dhe për verifikimin e lidhjeve të mundshme të të arrestuarit me aktivitetin kriminal në Greqi.
