Ish-ministrja turke Fatma Betül Sayan Kaya është arrestuar në kuadër të një hetimi mbi transaksionet në tregun e kapitalit, nën dyshimin për shkelje të Ligjit të Tregut të Kapitalit dhe anëtarësim në një organizatë kriminale. Lajmi është bërë i ditur nga Prokuroria e Stambollit.
Sipas dokumentit të prokurorisë, Kaya dyshohet se dispononte informacione që mund të ndikonin në çmimin e aksioneve të kompanisë “Ozata Denizcilik”, raportoi agjencia Anadolu.
Hetuesit bëjnë të ditur se ish-ministrja bleu aksione të kësaj kompanie në prill 2026 dhe i shiti më 16 shtator, një ditë përpara vendimit për likuidimin e fondeve.
Sipas prokurorisë, Kaya dyshohet se ishte në dijeni të likuidimit të afërt të fondeve. Gjithashtu, ajo dyshohet se ia transferoi aksionet kompanisë “Tera Yatirim Menkul Degerler”, e cila ia pagoi vlerën e tyre po atë ditë, në vend që pagesa të kryhej brenda afatit të zakonshëm prej dy ditësh pune.
Ndërkohë, ish-kryetari i Bordit të Tregjeve të Kapitalit, Ibrahim Ömer Gönül, dhe İlyas Kaya janë liruar nën masa të mbikëqyrjes gjyqësore. Masat përfshijnë detyrimin për t’u paraqitur rregullisht pranë autoriteteve dhe ndalimin e udhëtimit jashtë vendit.
