Policia e Tiranës ka vendosur 12 gjoba administrative ndaj protestuesve që dyshohet se bllokuan qarkullimin e automjeteve gjatë tubimit të zhvilluar pasditen e së enjtes në bulevardin “Dëshmorët e Kombit”.
Sipas njoftimit të Policisë, masat janë marrë në zbatim të Aktit Normativ nr. 5, datë 28 tetor 2026, konkretisht të pikës 2 të nenit 24/1.
Policia bën të ditur se 12 personat kanë penguar qarkullimin e mjeteve të transportit, pavarësisht thirrjeve të përsëritura të efektivëve përmes megafonit për lirimin e rrugës. Për secilin prej tyre është vendosur një gjobë administrative në vlerën 5 000 lekë.
Njoftimi i policisë:
Tiranë/Bllokuan rrugën dhe penguan qarkullimin e automjeteve, gjatë tubimit të djeshëm, vendosen 12 masa administrative.
Lexo gjithashtu
Në zbatim të Aktit Normativ nr. 5, datë 28.10.2026, konkretisht pikës 2 të nenit 24/1, janë plotësuar 12 procesverbale për konstatimin e kundërvajtjeve administrative të kryera gjatë tubimit të zhvilluar pasditen e djeshme, në bulevardin “Dëshmorët e Kombit”, për shtetas që kanë bllokuar rrugën dhe kanë penguar qarkullimin e mjeteve të transportit, pavarësisht thirrjeve të përsëritura të punonjësve të Policisë, nëpërmjet megafonit.
Për secilin prej këtyre shtetasve është vendosur masa administrative gjobë në vlerën 5 000 lekë.
Materialet procedurale iu referuan Prokurorisë, për veprime të mëtejshme.
