Ministri grek i Shëndetësisë, Adonis Georgiadis, ka bërë të ditur se email-i i tij është hakuar nga persona ende të paidentifikuar, të cilët kanë përdorur emrin e tij për të kryer porosi të pazakonta: 150 makina Porsche Cayenne, 50 Mercedes-Maybach dhe 25 armë zjarri.
Lajmin e bëri publik vetë Georgiadis përmes një postimi në rrjetin social X, ku njoftoi gjithashtu se ka kontaktuar Prokurorinë për Krimin Kibernetik dhe do të ndjekë rrugën ligjore.
Sipas postimit të tij, personat që kanë hyrë në llogarinë elektronike kanë dërguar porosi për 150 automjete Porsche Cayenne, 50 Mercedes-Maybach, 24 pushkë Benelli dhe një armë të tipit Springfield Armory Echelon.
Në fotografitë e publikuara nga ministri shfaqen edhe mesazhet e dërguara drejt kompanisë Porsche, ku personi që ka përdorur email-in prezantohet si Adonis Georgiadis dhe pretendon se po kryen blerjet për vete dhe bashkëshorten, Evgenia Manolidou.
Georgiadis e komentoi incidentin me ironi, duke thënë se porositë ishin një mënyrë e pazakontë për t’i uruar ditëlindjen.
Lexo gjithashtu
“Për ditëlindjen time, ata kishin përgatitur surprizën e mëposhtme. Hakuan email-in tim dhe, duke përdorur emrin tim, bënë porositë e mëposhtme”, shkroi ministri.
Ai shtoi se kishte kontaktuar Prokurorinë për Krimin Kibernetik dhe do të ndërmerrte veprime ligjore.
Në një prononcim për televizionin SKAI, ministri tha se i kishte zbuluar porositë gjatë kontrollit të mesazheve hyrëse dhe dalëse të email-it.
“E bëra publike që të mos mendonin se i kisha bërë unë këto porosi dhe të më kërkonin para. Shumë argëtim, nuk ka rëndësi, gjithçka është në rregull”, u shpreh ai.
Georgiadis paralajmëroi gjithashtu se qytetarët duhet të tregojnë kujdes në përdorimin e komunikimeve elektronike, duke pasur parasysh rreziqet e sigurisë kibernetike.
Ανήμερα των γενεθλίων μου, μου επιφύλαξαν την εξής έκπληξη. “Χάκαραν» το email μου και χρησιμοποιώντας το όνομα μου, έκαναν τις ακόλουθες παραγγελίες. 150 Porsche Cayenne, 50 Mercedes Maybach, 24 Benelli καραμπίνες και 1 Springfield Armory Echelon όπλο. Τους ευχαριστώ για τον πρωτότυπο τρόπο να μου ευχηθούν για τα γενέθλια μου αλλά τους ενημερώνω ότι μόλις επικοινώνησα με την Δίωξη Ηλεκτρονικού Εγκλήματος και θα κινηθώ νομικά. Χρόνια μου Πολλά, λοιπόν… Υ.Γ. Ευτυχώς, δεν έχω τέτοια απωθημένα…
— Άδωνις Γεωργιάδης (@AdonisGeorgiadi) November 6, 2026
