Pas humbjes në zgjedhjet presidenciale në Brazil dhe vendosjes së një ndalimi udhëtimi, Flavio Bolsonaro ka mbërritur në Miami të Floridës, së bashku me bashkëshorten dhe dy vajzat e tij.
Sipas raportimeve të mediave, senatori brazilian udhëtoi me një avion privat, në pronësi të një biznesmeni argjentinas, duke kaluar nga Argjentina dhe Ekuadori për të shmangur hapësirën ajrore braziliane.
Avioni Gulfstream IV u nis nga Guayaquil i Ekuadorit dhe mbërriti në aeroportin Miami-Opa Locka, i përdorur kryesisht nga avionët privatë. Pas zbritjes, Bolsonaro dhe familja e tij qëndruan për pak kohë brenda aeroportit dhe më pas u larguan me automjete, të shoqëruar nga policia dhe të mbuluar nga çadra të zeza për t’iu shmangur kamerave.
Sipas raportimeve, një zyrtar i lartë i Departamentit të Shtetit amerikan kishte bërë të ditur se vizat do t’i jepeshin Bolsonaros dhe familjes së tij. Ndërkohë, presidenti amerikan Donald Trump deklaroi se do të miratonte hyrjen e tyre në Shtetet e Bashkuara, duke e cilësuar situatën zgjedhore në Brazil si të pazakontë dhe duke shprehur kritika për procesin.
Ndërkohë, Policia Federale e Brazilit është përballur me kritika për mënyrën se si Bolsonaro arriti të largohej nga vendi, pavarësisht ndalimit të udhëtimit.
Lexo gjithashtu
Presidenti brazilian Lula da Silva reagoi ashpër ndaj largimit të Bolsonaros, duke e cilësuar atë si të turpshëm. Gjatë një aktiviteti në Brasilia, Lula kritikoi familjen Bolsonaro për qëndrimin e saj ndaj Shteteve të Bashkuara.
Nga ana tjetër, Flavio Bolsonaro nuk bëri asnjë deklaratë për mediat pas mbërritjes në Miami. Sipas raportimeve, ai pritet të dalë në një konferencë për shtyp në ditët në vijim.
Për momentin, mbetet e paqartë nëse Bolsonaro dhe familja e tij do të qëndrojnë për një periudhë të gjatë në Shtetet e Bashkuara apo nëse udhëtimi i tyre është i përkohshëm.
