Vetëm një ditë pasi rriti me 6 lekë çmimin e naftës, Bordi i Transparencës ka vendosur ta ulë sërish atë me të njëjtën vlerë. Sipas vendimit të ri, çmimi maksimal i shitjes me pakicë të naftës do të jetë 212 lekë për litër, nga 218 lekë që ishte një ditë më parë.
Vendimi u mor në mbledhjen e radhës të Bordit të Transparencës, të zhvilluar më 31 tetor 2026, në kuadër të masave për administrimin e përkohshëm të çmimeve të hidrokarbureve.
- Nafta: jo më shumë se 212 lekë/litër me pakicë dhe 200 lekë/litër me shumicë.
- Benzina: jo më shumë se 179 lekë/litër me pakicë dhe 167 lekë/litër me shumicë.
Çmimet e reja hynë në fuqi më 31 tetor, në orën 12:00, dhe do të mbeten të vlefshme deri në mbledhjen e ardhshme të Bordit, kur do të shqyrtohen ndryshimet e mundshme.
Bordi u ka tërhequr vëmendjen operatorëve të tregtimit me shumicë dhe pakicë për detyrimin e zbatimit të çmimeve të përcaktuara, duke paralajmëruar pezullimin e aktivitetit në rast shkeljesh.
Ministria e Ekonomisë dhe Inovacionit, së bashku me Ministrinë e Financave dhe Ministrinë e Infrastrukturës dhe Energjisë, deklaron se është angazhuar për mbrojtjen e interesave të konsumatorëve dhe ruajtjen e konkurrencës së ndershme në treg.
