María del Carmen Abascal, 87 vjeç, ka ndërruar jetë në Madrid, vetëm dy javë pasi u dëbua nga apartamenti ku kishte jetuar për më shumë se 70 vjet. Rasti i saj u kthye në simbol të krizës së strehimit në Spanjë dhe nxiti protesta në disa qytete të vendit.
Abascal, e njohur gjerësisht si Maricarmen, u dëbua nga banesa pasi apartamenti ishte blerë nga një firmë investimi që kërkonte rritjen e qirasë me rreth 230%. Gjatë operacionit të dëbimit, policia përdori gaz lotsjellës ndaj protestuesve, ndërsa 87-vjeçarja u nxor nga banesa me barelë.
Pamjet e ndërhyrjes shkaktuan reagime të forta në mbarë Spanjën. Vetëm disa orë pas dëbimit, rreth 10 mijë persona dolën në rrugët e Madridit në shenjë proteste, ndërsa demonstrata u zhvilluan edhe në qytete të tjera të vendit.
Nga spitali ku po trajtohej për lodhje të rëndë, Abascal kishte bërë thirrje për vazhdimin e protestave.
“Do të doja të isha atje me të gjithë ju”, kishte deklaruar ajo, duke u bërë thirrje qytetarëve të “luftojnë dhe mbrojnë atë që është e tyre”.
Lexo gjithashtu
Pas protestave, firma e investimeve që kishte blerë apartamentin deklaroi se Abascal mund të rikthehej në banesë. Sipas Sindikatës së Qiramarrësve të Madridit, ajo pritej të nënshkruante një kontratë të re qiraje për tetë vite, por ndërroi jetë në spital përpara se marrëveshja të finalizohej.
Vdekja e saj ka shkaktuar reagime të shumta politike. Kryeministri Pedro Sánchez shprehu ngushëllimet për familjen dhe miqtë e saj, ndërsa ministrja e Shëndetësisë, Mónica García, tha se rasti i Abascal kishte ndihmuar në rritjen e ndërgjegjësimit për krizën e strehimit në Spanjë.
Eurodeputetja e Podemos, Irene Montero, e cilësoi vdekjen e saj si “vrasje”, ndërsa kreu i Partisë Popullore, Alberto Núñez Feijóo, bëri thirrje që vdekja të mos përdorej për qëllime politike.
Ndërkohë, qeveria spanjolle ka miratuar masa të reja për strehimin, që përfshijnë zgjerimin e mbrojtjes nga dëbimet për personat në nevojë, rregullimin e qirave të dhomave, masa kundër blerjeve spekulative të pasurive të paluajtshme dhe lehtësime tatimore për pronarët dhe qiramarrësit.
Vdekja e Abascal ka ndodhur në një moment të tensionuar politik në Spanjë, pasi Sánchez ka shpallur zgjedhje të parakohshme të përgjithshme, ndërsa kriza e strehimit është kthyer në një nga çështjet kryesore të debatit politik.
Në Madrid, aktivistët që kanë ngritur një kamp proteste në qendër të qytetit mbajtën një moment heshtjeje pas lajmit për vdekjen e 87-vjeçares. Më pas, qindra protestues marshuan drejt parlamentit duke brohoritur:
“Maricarmen jeton, lufta vazhdon.”
