Pallati pesëkatësh në Elbasan, ku ndodhi shpërthimi i shkaktuar nga gazi dhe zjarri, do të shembet. Drejtoresha e Institutit të Ndërtimit, Persida Shkrepa, bëri të ditur se godina është vlerësuar si e pabanueshme për shkak të dëmtimeve të rënda.
Sipas Shkrepës, pallati është ndërtuar në vitet 1970 dhe ka pësuar dëmtime të konsiderueshme nga shpërthimi dhe zjarri.
“Ky është një objekt i ndërtuar në vitet ’70. Dëmtimet që ka pësuar kanë qenë të forta nga gazi dhe zjarri. Ne kemi konstatuar se objekti është i pabanueshëm. Duhet të merren masa sa më të shpejta për t’u demoluar”, deklaroi ajo.
Shkrepa sqaroi se njëri prej seksioneve të pallatit nuk është goditur drejtpërdrejt dhe se hyrja në të duhet të bëhet vetëm nën shoqërimin e forcave zjarrfikëse. Ndërsa seksioni tjetër është shpallur i pabanueshëm dhe i paarritshëm për banorët.
“Duhet të merren masa që edhe banorët që do të duhet të hyjnë në objekt, në seksionin e parë ku nuk ka pasur goditje, të shoqërohen nga forcat zjarrfikëse. Seksioni i dytë është i pabanueshëm dhe i paaksesueshëm nga asnjë banor”, u shpreh drejtoresha e Institutit të Ndërtimit.
Lexo gjithashtu
Ajo theksoi gjithashtu se duhet të merren masa sigurie në një rreze prej 30 metrash nga godina, për të mbrojtur edhe objektet përreth.
