Kryeministri Edi Rama ka komentuar për herë të parë publikisht akuzat e Erion Veliajt, i cili nga burgu e ka akuzuar se e ka kërcënuar përmes ministrit Toni Gogu dhe i ka kërkuar të japë dorëheqjen nga detyra e kryetarit të Bashkisë së Tiranës, duke e lidhur atë edhe me protestat.
I pyetur për këto akuza gjatë një konference për shtyp, Rama nuk u ndal te përmbajtja e tyre, por i krahasoi me zhurmat e makinave që qarkullojnë në bulevard. Kryeministri foli gjithashtu për progresraportin e Komisionit Europian dhe punën e qeverisë për anëtarësimin e Shqipërisë në BE.
Rama e cilësoi progresraportin si një pasqyrë të punës së qeverisë dhe tha se vlerësimi i tij për ecurinë e Shqipërisë është pozitiv. Ai theksoi se qeveria vijon punën me synimin për anëtarësimin e vendit në Bashkimin Europian, duke e cilësuar këtë proces si një mundësi historike për Shqipërinë.
Në fund, Rama iu referua drejtpërdrejt pyetjes për akuzat e Veliajt, duke i minimizuar ato dhe duke mos dhënë një përgjigje konkrete mbi pretendimet e kryebashkiakut të Tiranës.
Rama: Dua të them që raporti i progresit është, në radhë të parë, pasqyrë e punës së qeverisë dhe kush do të dijë se në çfarë forme është qeveria, lexon raportin e progresit dhe e ka aty dëftesën e qeverisë. Një dëftesë që mua më gëzon. Sepse është shumë e qartë që Shqipëria ka bërë një progres të madh, të cilin, për fat të keq, shqiptarët nuk e konstatojnë dot nga ekranet dhe kanalet e dezinformimit publik.
Lexo gjithashtu
Qeveria është në krye të detyrës dhe vazhdon të punojë, siç e kam thënë edhe më parë, çdo ditë, me pikërisht këtë objektiv për të cilin jemi mbledhur sot në këtë konferencë. Objektivin historik të bashkimit të vendit tonë me Europën dhe moslejimin e humbjes së një mundësie historike që e kemi krijuar me shumë punë, por që është ndihmuar edhe nga rreshtimi i yjeve në favor të Shqipërisë.
Të tjerat janë si këto zhurmat e makinave që shkojnë e vijnë në bulevard. Aq sa janë ato të rëndësishme për ne që jemi këtu, aq janë të rëndësishme për mua ato që pyetët ju.
