Përtej rivalitetit në fushën e blertë, sfida mes Elbasanit dhe Partizanit u shoqërua me një mesazh solidariteti nga tifozët, të cilët shprehën mbështetjen e tyre për Erjon Vishkullin, 28-vjeçarin e plagosur rëndë në sy gjatë protestës së 24 tetorit në Tiranë.
Në shkallët e stadiumit u shpalos një pankartë me mbishkrimin “Sot Erioni, nesër kush?”, përmes së cilës tifozët përcollën shqetësimin për ngjarjen dhe ngritën pikëpyetje mbi sigurinë e qytetarëve.
Mesazhi tërhoqi vëmendjen përtej rezultatit sportiv, duke e kthyer përballjen në një moment solidariteti për të riun dhe një çështje me rëndësi të veçantë shoqërore.
Erjon Vishkulli njihet mes sportdashësve për pasionin e tij ndaj futbollit dhe mbështetjen shumëvjeçare për Kombëtaren shqiptare. Plagosja e tij ka nxitur reagime dhe mesazhe solidariteti nga tifozëri të ndryshme në vend, duke dëshmuar se, përtej rivalitetit mes skuadrave, ka kauza që i bashkojnë të gjithë.
