Një çift nga Turqia ka marrë një vendim të pazakontë, duke lënë pas gjithçka që kishin ndërtuar për të realizuar një ëndërr familjare: një udhëtim njëvjeçar nëpër botë së bashku me dy fëmijët e tyre të vegjël.
Tuğba Kurt dhe bashkëshorti i saj vendosën të shesin shtëpinë, makinën dhe sendet personale për të siguruar financat e nevojshme për këtë aventurë. Familja, pjesë e së cilës janë edhe Lina 4-vjeçare dhe Bulut, 1 vjeç e gjysmë, ka arritur të vizitojë 22 shtete dhe më shumë se 30 qytete, duke e nisur udhëtimin nga Azia.
Për të realizuar këtë plan, të dy prindërit morën leje nga puna dhe organizuan çdo detaj duke pasur në qendër sigurinë, shëndetin dhe nevojat e fëmijëve.
Vendimi i tyre nuk u prit mirë nga të gjithë. Siç ka treguar Tuğba për median turke “Milliyet”, njerëzit përreth i kritikuan dhe i paralajmëruan se po rrezikonin të ardhmen e familjes duke hequr dorë nga shtëpia dhe pasuritë e tyre.
Megjithatë, çifti nuk ndryshoi mendje. Ata besojnë se kjo përvojë u ka dhënë fëmijëve një mundësi të rrallë për të zbuluar kultura të ndryshme, për të dëgjuar gjuhë të reja dhe për të njohur mënyra të ndryshme jetese që në moshë të vogël.
Lexo gjithashtu
“Paratë mund të fitohen përsëri, sendet mund të blihen sërish, por koha që kalon nuk kthehet më”, është shprehur Tuğba, duke shpjeguar filozofinë që qëndron pas zgjedhjes së tyre.
Pavarësisht sfidave që ka sjellë ky udhëtim, familja thotë se nuk është penduar për vendimin. Një tjetër siguri për ta është fakti se të dy prindërit kanë të drejtë të rikthehen në vendet e tyre të punës pas përfundimit të lejeve.
Për çiftin turk, pasuria më e madhe nuk është ajo që lanë pas, por koha dhe kujtimet që po krijojnë së bashku me fëmijët e tyre.
