Kryeministri Edi Rama ka ndarë në rrjetet sociale disa fotografi nga mbledhja e Asamblesë Kombëtare të Partisë Socialiste, e zhvilluar këtë të shtunë, duke shoqëruar publikimin me një mesazh për procesin e integrimit të Shqipërisë në Bashkimin Europian.
Rama është ndalur te rekomandimi i përfshirë në Raportin e Zgjerimit të BE-së, i cili parashikon nisjen e përgatitjeve gjatë vitit 2027 për hartimin e Traktatit të Anëtarësimit të Shqipërisë në Union. Kreu i qeverisë e ka cilësuar këtë zhvillim si historik, duke e konsideruar një prej arritjeve më të rëndësishme në rrugëtimin europian të vendit.
Në mesazhin e tij, kryeministri ka theksuar se asnjë ngjarje apo incident nuk duhet ta largojë Shqipërinë nga objektivi strategjik i anëtarësimit në Bashkimin Europian deri në vitin 2030. Referenca e tij vjen edhe në një kohë kur vendi është përfshirë nga protesta dhe zhvillime të tensionuara politike.
Duke iu referuar atmosferës në Asamblenë Kombëtare, Rama është shprehur se ka konstatuar entuziazëm te socialistët për nisjen e një beteje të re politike, me synimin për të arritur një tjetër fitore.
Në përfundim të reagimit, kreu i qeverisë ka përmendur edhe datën 9 maj 2027, duke e lidhur atë me Ditën e Europës dhe Partinë Socialiste.
Lexo gjithashtu
“9 MAJI 2027 DO TË JETË DITA E EUROPËS DHE E PARTISË SOCIALISTE – për këtë s’ka nevojë të shkojmë deri në Kuç”, shkruan Rama në postimin e tij.
