Kampioni francez i xhudos, Teddy Riner, ka njoftuar kandidaturën e tij për zgjedhjet presidenciale të vitit 2027 në Francë.
37-vjeçari, i cili ka fituar pesë medalje të arta olimpike, e bëri publik vendimin këtë të hënë, përmes një videoje të publikuar në rrjetet sociale, si dhe në një intervistë për gazetën franceze “Le Parisien”.
“Quhem Teddy Riner dhe sot jua them sy më sy: jam kandidat për zgjedhjet presidenciale të vitit 2027”, deklaroi kampioni francez.
Riner, i cili vjen nga Guadalupeja, një territor francez në Karaibe, thotë se synon të bashkojë francezët përtej ndarjeve politike. Ai e përkufizon veten si as të majtë dhe as të djathtë, ndërsa synon të bëhet një president që bashkon dhe pajton shoqërinë.
“Dua të tregoj se Franca mund të ringrihet”, është mesazhi i tij, ndërsa sloganin e fushatës e ka zgjedhur: “La France qu’on veut” (Franca që duam).
Lexo gjithashtu
Sportisti thotë se vendimin për t’u futur në politikë e ka menduar që pas Lojërave Olimpike të Parisit në vitin 2024, por se shqetësimi për përçarjen sociale, zemërimin e qytetarëve dhe mungesën e shpresës për të ardhmen e kanë shtyrë të ndërmarrë këtë hap.
Ai ka bërë të ditur se synon ta çojë deri në fund garën presidenciale, pa përjashtuar mundësinë për të vazhduar njëkohësisht karrierën sportive dhe për të marrë pjesë në Lojërat Olimpike të Los Anxhelosit në vitin 2028.
Megjithatë, për të qenë zyrtarisht në garën presidenciale, Riner duhet të sigurojë edhe 500 firmat e mbështetjes nga përfaqësues të zgjedhur, sipas rregullave zgjedhore franceze
