Artistja shqiptare Rinesa Qeriqi, e njohur me emrin artistik Rinesancë, është ndarë nga jeta në moshën 25-vjeçare, pas një beteje të gjatë me një tumor në tru.
Lajmin e trishtë e ka bërë të ditur motra e saj, Drenisa, përmes një mesazhi prekës në rrjetet sociale, ku i ka dhënë lamtumirën të motrës dhe ka shprehur dhimbjen e familjes për humbjen e saj.
Rinesa, artistja nga Kosova, u diagnostikua me tumor në tru në vitin 2025 dhe iu nënshtrua ndërhyrjeve kirurgjikale, si dhe trajtimeve me rrezatim. Përballë vështirësive shëndetësore dhe kostove të trajtimit, familjarët e saj kishin kërkuar edhe ndihmë financiare.
E lindur në Prishtinë, Rinesa jetonte dhe krijonte në Kanada. Ajo ishte këngëtare, tekstshkruese dhe kompozitore, e cila u dallua për stilin e saj të veçantë, duke ndërthurur hip-hopin alternativ me elemente të indie rock-ut dhe emo-s.
Përmes interpretimeve dhe teksteve personale, Rinesancë kishte nisur të krijonte identitetin e saj në skenën muzikore, duke lënë pas një rrugëtim artistik që u ndërpre tragjikisht në një moshë shumë të re.
