Kreu i Partisë Demokratike, Sali Berisha, ka akuzuar qeverinë për dhunën e ushtruar ndaj të rinjve gjatë protestave në Tiranë, gjatë fjalës së tij në Kuvend.
Berisha përdori tone të ashpra, duke krahasuar situatën e krijuar gjatë protestave me episode të rënda dhune dhe duke akuzuar deputetët e mazhorancës për përgjegjësi.
“Java dhe ditët që kaluan, Tirana pa barbari të papara, që nuk janë parë as në pushtime. Në rrugët e Tiranës u thyen kocka të të rinjve, u thyen kafka, u ushtruan format më të egra kundër të rinjve. Këta parlamentarë që shihni këtu janë më kriminelë se ata që thyejnë kocka dhe kafka. Këta janë kriminelë dhe këta e meritojnë gazin lotsjellës, plumbat e gomës, kafkat e thyera dhe kockat e thyera”, deklaroi Berisha.
Gjatë fjalës së kreut të PD-së, kryetari i Kuvendit, Niko Peleshi, ndërhyri dhe ia ndërpreu fjalën, duke argumentuar se deklaratat e Berishës përbënin thirrje për dhunë.
“Zoti Berisha ky nuk është procedurë, por është përdhunim… T’i hiqet fjala, sipas rregullores ju hiqet e drejta e fjalës për ditën e sotme. Keni bërë thirrje për dhunë nga foltorja e Kuvendit. Uluni te vendi juaj, s’keni të drejtë fjale për gjithë ditën e sotme”, tha Peleshi.
