Dy persona janë arrestuar dhe nëntë të tjerë janë proceduar penalisht pas incidentit të ndodhur më 14 nëntor në fshatin Kameras, në aksin Maminas–Gjiri i Lalzit. Sipas policisë, grupi ka tentuar të bllokojë eskortën e kryeministrit Edi Rama, ndërsa në drejtim të automjeteve janë hedhur vezë dhe sende të forta.
Të arrestuarit janë Albi Dema, 28 vjeç, dhe Edison Likaj, 37 vjeç, të dy banues në Tiranë. Ata akuzohen për veprën penale “Goditje për shkak të detyrës”.
Ngjarja ndodhi rreth orës 10:00, kur personat e përfshirë tentuan të pengonin qarkullimin në rrugë dhe hodhën vezë e sende të forta në drejtim të automjeteve të eskortës së kryeministrit.
Përveç dy të arrestuarve, policia ka proceduar penalisht në gjendje të lirë edhe nëntë persona, mes tyre pesë vajza, për veprën penale “Prishja e qetësisë publike”.
Njoftimi i Policisë
Lexo gjithashtu
Specialistët për Hetimin e Krimeve në Komisariatin e Policisë Durrës arrestuan në flagrancë shtetasit:
E. L., 28 vjeç, dhe A. D., 37 vjeç, të dy banues në Tiranë, për veprën penale “Goditje për shkak të detyrës”.
Gjithashtu, proceduan penalisht në gjendje të lirë shtetasit:
E. P., 33 vjeçe, D. G., 50 vjeç, O. D., 34 vjeç, M. C., 28 vjeçe, L. A., 24 vjeçe, I. R., 31 vjeç, N. S., 23 vjeçe, J. S., 25 vjeçe, të tetë banues në Tiranë, si dhe I. Ll., 27 vjeç, banues në Fier, për veprën penale “Prishja e qetësisë publike”.
Këta shtetas, më datë 14.11.2026, rreth orës 10:00, në fshatin Kameras, në aksin rrugor Maminas–Gjiri i Lalzit, kanë tentuar të bllokojnë rrugën dhe kanë hedhur vezë dhe sende të forta në drejtim të automjeteve të personaliteteve të larta shtetërore.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme.
