Pentagoni po përgatit një plan ambicioz për krijimin e rezervave strategjike të mineraleve kritike, karburantit dhe materialeve të tjera jetike, në një shkallë që kujton periudhën e Luftës së Ftohtë.
Nisma, e emërtuar “FORTRESS America”, synon të garantojë vazhdimësinë e operacioneve ushtarake amerikane edhe në rast të një krize të rëndë, ku sulmet kibernetike mund të paralizojnë fabrikat, rrjetet elektrike dhe infrastrukturën energjetike të vendit.
Plani sic bën me dije altmedia parashikon grumbullimin e rezervave të mineraleve kritike, karburantit, municioneve, ilaçeve dhe pjesëve rezervë, me qëllim shmangien e ndërprerjeve në furnizimin e ushtrisë gjatë një konflikti apo emergjence kombëtare.
Një tjetër element i rëndësishëm është forcimi i pavarësisë energjetike të bazave ushtarake amerikane. Objektivi është që instalimet kryesore ushtarake të kenë kapacitetin të funksionojnë deri në 90 ditë edhe në rast të ndërprerjes së furnizimit me energji nga rrjeti civil.
Nisma synon të adresojë dobësitë e zinxhirëve të furnizimit dhe varësinë nga burimet e jashtme, veçanërisht për mineralet dhe materialet që përdoren në prodhimin e pajisjeve moderne ushtarake.
Programi vjen në një kohë kur siguria e infrastrukturës kritike dhe kërcënimet kibernetike po konsiderohen gjithnjë e më shumë si faktorë vendimtarë për gatishmërinë ushtarake.
Megjithatë, krijimi i rezervave në përmasat e parashikuara kërkon kohë dhe investime të konsiderueshme. Krahasimi me Luftën e Ftohtë lidhet me shkallën e përgatitjeve strategjike dhe jo me një paralajmërim për një luftë të afërt.