Një 24-vjeçar shqiptar është ndaluar nga policia gjermane pasi u kap duke udhëtuar pa biletë në një tren të shpejtësisë së lartë ICE, në linjën nga Berlini.
Sipas raportimeve nga autoritetet gjermane, i riu u konstatua nga kontrollori pa një biletë udhëtimi dhe iu kërkua të zbriste në Potsdam. Por situata mori një tjetër rrjedhë pasi, në Stacionin Qendror të Magdeburgut, shqiptari dyshohet se tentoi të vazhdonte udhëtimin duke u kapur në pjesën e jashtme, mes vagonave të trenit.
Sjellja e tij alarmoi punonjësin e hekurudhës, i cili njoftoi menjëherë policinë. Efektivët ndërhynë dhe bënë të mundur ndalimin e 24-vjeçarit.
Tashmë i riu rrezikon të përballet me procedime penale për shmangie të pagesës së biletës, si dhe për shkelje të tjera të legjislacionit që rregullon sigurinë dhe funksionimin e transportit hekurudhor.
Inspektorati Federal i Policisë në Magdeburg ka paralajmëruar se udhëtimi në pjesën e jashtme të trenave dhe lëvizja mbi shinat hekurudhore përbëjnë rrezik serioz për jetën, duke theksuar se veprime të tilla mund të kenë pasoja fatale.
