Avokati Michael Sanft, i cili ishte pjesë e ekipit mbrojtës të Duane “Keffe D” Davis në procesin gjyqësor për vrasjen e reperit legjendar Tupac Shakur, është gjetur i vdekur në banesën e tij në moshën 55-vjeçare. Lajmi është raportuar nga gazeta amerikane “Las Vegas Review-Journal”.
Vdekja e tij vjen vetëm pak javë pas një zhvillimi të rëndësishëm në çështjen që për afro tri dekada mbeti një prej mistereve më të mëdha të historisë së muzikës hip-hop. Klienti i tij, Duane “Keffe D” Davis, u shpall fajtor nga juria dhe u dënua me 40 vite deri në burgim të përjetshëm për rolin e tij në organizimin e vrasjes së Tupac Shakur.
Reperi amerikan u qëllua për vdekje në shtator të vitit 1996, teksa ndodhej në sediljen e pasagjerit të një automjeti që drejtohej nga Marion “Suge” Knight, themeluesi i kompanisë diskografike “Death Row Records”. Ngjarja ndodhi në Las Vegas dhe për shumë vite autorët e saj mbetën të paidentifikuar. Davis u arrestua në vitin 2023, duke rikthyer në vëmendje një prej dosjeve më të bujshme kriminale në SHBA.
Sipas akuzës dhe vendimit të gjykatës, vrasja ishte organizuar si akt hakmarrjeje pas një përleshjeje fizike në kazinonë MGM Grand të Las Vegasit, ku ishin përfshirë Tupac Shakur, personat që e shoqëronin dhe nipi i Davis.
Ndërkohë, autoritetet policore në Las Vegas kanë bërë të ditur se nga verifikimet paraprake nuk janë konstatuar rrethana të dyshimta lidhur me vdekjen e avokatit Michael Sanft. Shkaku i saktë i ndarjes së tij nga jeta mbetet ende për t’u përcaktuar.
