Ish-kryetarja e Kuvendit dhe ish-ministrja e Jashtme, Elisa Spiropali, ka publikuar një mesazh me tone sfiduese në rrjetet sociale, duke rikthyer në vëmendje zërat për përplasje të brendshme në Partinë Socialiste dhe për një marrëdhënie të tensionuar me kryeministrin Edi Rama.
E shoqëruar me një fotografi që mbart simbolikë revolucionare, Spiropali ka zgjedhur fjalinë: “Thanë puçi dështoi, por unë sapo kam nisur”. Një mesazh që ka ngjallur diskutime për domethënien e tij dhe objektivin që mund të ketë pasur deputetja socialiste.
Ky reagim vjen në një klimë të tensionuar politike, pas zhvillimeve që lidhen me hetimet e SPAK-ut ndaj ish-zëvendëskryeministres Belinda Balluku dhe debatit mbi pretendimet për një “puç” politik e institucional kundër qeverisë, një term që është përdorur më herët edhe nga vetë Edi Rama.
Postimi i Spiropalit vjen gjithashtu pas kritikave që ajo ka artikuluar në periudhën e fundit ndaj mënyrës së drejtimit të Partisë Socialiste dhe qëndrimeve të kryeministrit. Këto zhvillime kanë shtuar pikëpyetjet mbi raportet mes saj dhe Ramës, si dhe mbi përplasjet e mundshme brenda mazhorancës.
Edhe pse Spiropali nuk ka dhënë një shpjegim të drejtpërdrejtë për mesazhin e publikuar, formulimi i zgjedhur dhe konteksti politik në të cilin vjen kanë nxitur interpretime të shumta për një tjetër sinjal sfidues në drejtim të zhvillimeve brenda PS-së.
