Kryeministri Edi Rama deklaroi se për shumë vite shqiptarët kanë jetuar mes një kontrasti të madh mes mundësive që ofronin vendet e Bashkimit Europian dhe kushteve të jetesës në Shqipëri.
Gjatë konferencës së përbashkët me ambasadoren e BE-së, Sofia Moreira de Sousa, Rama tha se emigracioni ka qenë për shumë familje një rrugë drejt shërbimeve më të mira, mundësive ekonomike dhe një marrëdhënieje më të sigurt me shtetin.
Sipas kryeministrit, integrimi europian nuk duhet parë si një proces që synon të kënaqë Brukselin, Parisin apo Berlinin, por si një mundësi për të ndërtuar një shtet me standarde europiane, ku qytetarët të kenë siguri juridike, institucione funksionale dhe kushte më të mira jetese.
“Shqiptarët kanë jetuar për shumë vite në një kontrast të madh, mes mundësive jashtë vendit dhe atyre brenda vendit. Për shumë familje, emigracioni ka qenë rruga drejt një jete më të mirë, një shërbimi më të mirë apo një marrëdhënieje më të sigurt me shtetin”, u shpreh Rama.
Ai theksoi se diskutimi për integrimin nuk mund të shkëputet nga realiteti me të cilin janë përballur qytetarët ndër vite.
Lexo gjithashtu
“I gjithë ky proces nuk është për Brukselin, Parisin, Berlinin, por për shtetbërjen europiane të Shqipërisë, ku shqiptarët të kenë institucionet, mundësitë ekonomike, sigurinë juridike dhe vendrritjen e fëmijëve si në Europë”, deklaroi kryeministri.
Kreu i qeverisë nënvizoi se përparimi në procesin e integrimit duhet të përkthehet në përmirësim konkret të standardeve të jetesës për qytetarët, pavarësisht vendit ku jetojnë.
Ai tha se ky ishte një nga motivet kryesore të përkushtimit të tij ndaj procesit të integrimit dhe shprehu kënaqësinë për vlerësimin e paraqitur në progresraportin e fundit të Komisionit Europian.
“Kjo është arsyeja që unë jam kaq i përkushtuar ndaj këtij procesi, por edhe arsyeja pse mua më gëzon shumë ky raport i progresit, si një dëftesë shumë objektive e përparimit të madh të Shqipërisë”, përfundoi Rama.
