Një ngjarje tronditëse është zbardhur në Australi, ku ish-mësuesja e muzikës Naomi Tekea Craig, 34 vjeçe, është dënuar me 8 vite e 6 muaj burg për abuzimin seksual të një nxënësi të mitur, me të cilin ajo solli në jetë edhe një fëmijë.
Sipas mediave australiane, abuzimi ka zgjatur për rreth 16 muaj, nga gushti i vitit 2024 deri në dhjetor 2025. Në kohën kur nisën ngjarjet, djali ishte vetëm 12 vjeç, ndërsa mbeti 13 vjeç kur mësuesja ngeli shtatzënë me të.
Craig e kishte njohur të miturin në shkollën ku punonte si mësuese muzike dhe drejtonte një grup muzikor ku ai ishte pjesë. Me kalimin e kohës, ajo krijoi marrëdhënie të afërta edhe me familjen e tij, duke fituar besimin e prindërve. Edhe pasi djali ndërroi shkollë, ajo vijoi të mbante kontakte me të dhe kishte akses në banesën e familjes.
Sipas dosjes gjyqësore, gruaja e manipulonte të miturin përmes mesazheve, dhuratave dhe presionit emocional, duke kërkuar që ai t’i kushtonte vëmendje dhe të mos komunikonte me vajza të tjera.
Rasti u zbulua pasi nëna e djalit instaloi kamera sigurie në banesë dhe pa pamjet që dokumentonin abuzimin. Ajo njoftoi menjëherë policinë, e cila arrestoi mësuesen në dhjetor të vitit 2025. Në janar të këtij viti, ajo solli në jetë një vajzë, e cila sipas hetimeve ishte fëmija i të miturit.
Gjatë seancës së dënimit, Craig shpërtheu në lot ndërsa gjykatësi John Prior përshkroi abuzimin dhe shkeljen e rëndë të besimit që ajo kishte përfituar nga pozicioni i saj si mësuese. Gjykata theksoi se djali ishte veçanërisht i cenueshëm dhe se pasojat e kësaj ngjarjeje mund ta shoqërojnë gjatë gjithë jetës.
Gruaja u dënua për 12 vepra penale që lidhen me abuzimin seksual të fëmijëve. Ajo do të mund të kërkojë lirimin me kusht vetëm pasi të ketë vuajtur të paktën 6 vite e 6 muaj burg. Gjithashtu, është regjistruar si shkelëse seksuale dhe i është ndaluar përgjithmonë ushtrimi i profesionit të mësueses.