Presidenti amerikan Donald Trump ka paralajmëruar Iranin se do të përballet me pasoja të rënda, nëse konfirmohet se Teherani po planifikon një sulm ndaj Uashingtonit me “bombë të pistë” apo armë kimike.
Deklarata e tij vjen pas raportimeve të CNN, sipas të cilave inteligjenca amerikane ka siguruar informacione se Irani mund të jetë duke shqyrtuar mundësinë e një sulmi të tillë në kryeqytetin amerikan.
I pyetur nga gazetarët në Manila për këto pretendime, Trump tha se autoritetet po e analizojnë këtë skenar, duke paralajmëruar një përgjigje të paprecedentë në rast se një plan i tillë ekziston.
“Ne po e shqyrtojmë. Nëse ekziston një plan i tillë, ata do të paguajnë një çmim që asnjë vend nuk e ka paguar ndonjëherë më parë”, u shpreh presidenti amerikan. Ai shtoi se shpreson që Irani të mos jetë duke përgatitur një sulm, por nënvizoi se informacionet po trajtohen me seriozitet të lartë.
Megjithatë, Shtëpia e Bardhë ka bërë të ditur se deri tani nuk ka kërcënime të besueshme dhe të menjëhershme ndaj territorit amerikan.
Teherani i ka hedhur poshtë akuzat, duke i cilësuar raportimet si të pabaza dhe pjesë të një përpjekjeje për të krijuar justifikime për veprime të mëtejshme kundër Iranit.
Sipas CNN, informacionet e inteligjencës flasin për shqyrtimin e mundësive të një sulmi, por jo për një vendim të marrë për të ndërmarrë një operacion të tillë.