Një dënim me burgim të përjetshëm është dhënë nga Gjykata Rajonale e Wiener Neustadt në Austri ndaj një 47-vjeçari nga Kosova, i akuzuar për vrasjen e bashkëshortes së tij 38-vjeçare, nënë e katër fëmijëve.
Vendimi u shpall të martën, më 17 nëntor 2026, pas përfundimit të procesit gjyqësor për ngjarjen e rëndë të ndodhur më 5 prill në Soob, në distriktin e Badenit.
Sipas aktakuzës, 47-vjeçari kishte shkuar në banesën ku jetonte bashkëshortja, me të cilën ishte i ndarë, me rastin e Pashkëve, duke marrë dhurata për fëmijët. Pas një konflikti, ai e kishte qëlluar gruan tri herë me armë zjarri dhe më pas e kishte goditur rreth 40 herë me kaçavidë, duke i shkaktuar vdekjen.
Sipas raportimeve të mediave austriake, çifti kishte qenë i martuar prej 19 vitesh dhe kishte katër fëmijë së bashku. Gruaja ishte larguar nga bashkëshorti që prej vitit 2019, pas episodeve të dhunës, dhe ishte vendosur me fëmijët në një banesë tjetër.
Gjatë procesit gjyqësor, 47-vjeçari kishte pretenduar se kishte vepruar në vetëmbrojtje. Megjithatë, të tetë anëtarët e jurisë votuan unanimisht për shpalljen e tij fajtor për vrasje. Përveç burgimit të përjetshëm, gjykata urdhëroi edhe vendosjen e tij në një institucion të posaçëm psikiatrik dhe terapeutik, për shkak të rrezikshmërisë së konstatuar nga ekspertiza.
Në të njëjtin proces, një 45-vjeçar, i akuzuar se kishte siguruar armën e përdorur në krim, u shpall i pafajshëm.
Katër fëmijëve të viktimës iu njoh gjithashtu e drejta për nga 75 mijë euro dëmshpërblim për vuajtjen emocionale.
Megjithatë, vendimi nuk është ende i formës së prerë. I dënuari ka paralajmëruar ankimim dhe kundërshtim të vendimit në instancat më të larta gjyqësore.