Presidenti amerikan, Donald Trump, ka dalë në mbrojtje të fushatës ushtarake të Shteteve të Bashkuara dhe Izraelit kundër Iranit, duke pretenduar se ndërhyrja e tij për të ndalur programin bërthamor të Teheranit ka shmangur një katastrofë për të gjithë rajonin.
Përmes një postimi në platformën e tij “Truth Social”, Trump ka theksuar se pa vendimin e tij për të vepruar kundër ambicieve bërthamore të Iranit, as Izraeli dhe as Lindja e Mesme nuk do të ishin në gjendjen e sotme.
“Izraeli dhe, në fakt, e gjithë Lindja e Mesme, nuk do të ekzistonin sot po të mos e kisha ndaluar unë Iranin nga marrja e një arme bërthamore. Askush nuk dëshiron ta thotë këtë, por të gjithë e dinë se është e vërtetë!”, shkroi presidenti amerikan.
Deklarata vjen në një moment të vështirë politik për Trumpin dhe Partinë Republikane, pas rezultateve të zgjedhjeve të mesmandatit, ku republikanët pësuan humbje përballë demokratëve.
Presidenti ka pranuar se pakënaqësia e qytetarëve ndaj konfliktit të zgjatur në Lindjen e Mesme, së bashku me rritjen e inflacionit dhe kostos së jetesës, kanë ndikuar në klimën politike dhe në rezultatin zgjedhor.
Lexo gjithashtu
Megjithatë, Trump vazhdon të këmbëngulë se ndërhyrja ushtarake kundër Iranit ishte një vendim i domosdoshëm për të parandaluar një kërcënim më të madh, duke e cilësuar atë si një hap me rëndësi historike.
Konflikti ka pasur pasoja të ndjeshme edhe në ekonominë globale, veçanërisht në tregjet e energjisë, duke nxitur shqetësime për çmimet dhe presionet inflacioniste në vende të ndryshme.
Ndërkohë, përpjekjet diplomatike për uljen e tensioneve vijojnë. Katari dhe aktorë të tjerë ndërkombëtarë po angazhohen për të lehtësuar arritjen e një marrëveshjeje armëpushimi ose një ujdie të përkohshme mes Uashingtonit dhe Teheranit.
